睇返一張 24 年前嘅相，嗰時我啱啱出嚟做嘢，青春無敵。睇住嗰個自己，我諗起一個問題，嗰時候嘅我，究竟係想做一個咩人？又或者佢有冇諗過24年之後佢係點樣㗎呢？ 我哋由細到大，都係喺「成為一個值得被認同嘅人」呢個框架入面長大。想有社會地位、想被人尊重、想係群體裏面有個位置。呢個唔係壞事，因為 biologically 我哋係咁嘅，因為被孤立就係危險，等同於死亡。所以我哋嘅腦係天生就想融入、想被接受。 但正正因為呢個設計，好多人從來冇問過自己：「如果呢個世界冇晒人，得返我自己一個，我會想自己係一個咩人？」 有啲人會為咗搵到呢個答案，一個人去旅行一個月，去山裏面隱修，刻意離開所有人嘅目光。因為只有喺冇人睇住你嘅時候，你先有機會聽到那個最真實嘅自己。 仲有一樣嘢我一直好好奇，我哋腦入面嗰把聲，嗰把不停批判你、提醒你、叫你小心嘅聲，究竟係你自己嘅聲音，定係某一個人嘅聲音住喺你腦裏面？佢係真心站喺你嗰邊，定係佢其實係另一個人嘅標準喺度評判你？ 我自己呢幾年轉化咗好多。唔係話完全唔理別人點睇，但我做每一個決定，我都會好認真問自己：「我係咪真係想？」而唔係「做完呢件事對我有咩好處、人哋會點睇我。」因為往往嗰個「好處」嘅背後都係喺其他人嘅眼光裏面得到。 我知道呢個轉變唔係一朝一夕，但係真係好值得。而我好想其他人都知道佢哋需要去開始去同自己重聚 ! 做緊一個 project ，教大家探索潛意識，希望呢個project可以幫到更多人喺呢條路上面再次遇返嗰個唔見咗嘅自己!